No de Arwed in de Praxis …. nä halt: des hat schunn ogfange in de Praxis…: dicke Wolke om Himmel owwe iwwerm Haardt, Gebrummel am Himmel, Dunner unn donn ischs losgonge: runnerkumme isses wie aus Woifässer (die Idee kummtmer, weil unnerm Fenscher werd grad s Burrer Woifeschd uffgebaut). Jesses, hoffentlich schwimme die moie unn iwwermoie net ford! Ich steh om Fenscher unn guck naus inn de schwarze Himmel. So a Gewitter is wie a Erlösung vunn de Schwüle.
Es ledschde Patiendegespschräch hab ich beschloinicht, weil es so arich gedunnert hat, dass mer Ongschd worn is, dem Combjuder hauds de Spund naus…
Aller: geh ich jetzerd uff de Johanneshof odder net? Do is heit unser Treffe.. do flieche jo die Zelt fort! Om Fenscher steh unn waade, dass es Recherunnermache nolossd.
Es hert uff… allerhopp: Chai, mir gehn!
Draus is es alsnoch schwiel unn dompfich.
De Himmel is altrosa ingfärbt unn es blitzt noch rum. Ich laaf zum Bus und staun mich dorch die Stroose, was so alles rumgfloche is.
Johanneshof, Siebeldingen: Jesses, ich mach doch grad die Kur do fer de Stoffwechsel, wo ich die Kohlehidrade wegloss unn a de Woi… u-pälzische Idee, des…. Awwer: se mache mer e Johannisbeerschorle, a e Schorle… unn ich kriie moi Steak miteme große Salat. Alles gut!!
Mir sitze do die Hinner- unn die Vorderpälzer und verzehle so iwwer alles Mechliche, vunn Wohrheide unn Onnerem, vunn komische Wolke unn sowas. Ich hab bei de Sieglinde noch Woi zerickleh losse unn als ich’s grad inlaade wollt: do blitzts unn dunnerds vunn de Weschdpalz her alles schwarz unn mer sieht de Wald nimmie vor lauter Wolke…. ich renn zerick zum Tisch unn schunn gehts los: es macht runner wie aus Ämer, mir ricke all in dem Zelt zamme und am Disch näwedro hawwe se ogfonge se singe: „es rähnt Grauburgunder, mir sinn in de Palz“
Mir honn so glacht und all zsommgehalde, dass a kenner nass werd.
Speeder hab ich den Woi inngelade und bin donn iwwer de Geilweilerhof dorch den Feldwech do gfahre, der no St. Johann nuffgeht, so e Hohlewech, uff Schotter…. urich….
Unn owwe donn war des Schauschpiel: Richtung Annweiler in de Wald nin unn iwwer de Burche alles voll mit dicke Wolke, wie Watte is des dringhonge. Unn de Himmel war orange-rot-blau im Sunneunnergong.
Ich hab noch gedenkt: Chef, wo is de Rächeboche? Hasch noch änder fer uns? Glaabsch noch an uns? Gilt doin Bund immer noch, aa wemmer uns so denäbebenemme??
Unn ich dreh mich im Auto rum: do isser in voller Bracht: a gonzer Rächeboche! Hinner mir nadierlich unn Richtung Landach…
Ich do gschdonne wie vumm Dunner geriehrt…
Do hab ich Eich a paar Bilder defu gmacht. Glaabners, solong de Herrgott noch mit uns redd, is noch Beziehung do. Wonner mol uffheerd: donn werds gfährlich!
Deswää: redden mitm! Jede Daach!! Sahnem, dass mir drobleibe onnem unn dass mer unser Läwe gonz noem richde dun unn dass mer donkbar sinn, dass ER des alles fer uns gmacht hat….
Guddie Nacht an Eich all!!
Halleluja Ute 😀
Das ist einmal eine wunderbare Lektüre am frühen Morgen
Dankeschön ❣️
Hey Ute.
Mal wieder wunderbar geschrieben 👍.
Gottes Welt als Geschenk in unseren Händen, lässt uns immer noch staunen und die Schönheit genießen.
Wir dürfen aber auch nicht vergessen, daß es in unserer Verantwortung liegt sie zu bewahren.
Liebe Grüße Michael